खबर पूर्वाञ्चल
मोरङ उद्योग ब्यापार संघ विराटनगरले पुस ९ गतेदेखि १७ गतेसम्म आयोजना गर्ने अन्तराष्ट्रियस्तरको कृषि, पर्यटन तथा औद्योगिक उत्पादनको विराट ट्रेड एक्स्पोकोे आयोजनाले यस क्षेत्रका औद्योगिक उत्पादन वृद्धि हुनका साथै कृषि उत्पादनको बजारीकरण गर्न सहयोग पुग्ने आज यहाँ आयोजित पत्रकार सम्मेलनमा जानकारी दिइयो ।
एक्स्पो विराटनगर–१ पोखरियामा आयोजना हुने र २० करोडको व्यापार हुने अनुमान रहेको संघका अध्यक्ष अनुपम राठीले जानकारी दिए।
एक्स्पोका संयोजक अमितकुमार सारडाका अनुसार एक्स्पोमा तीन बटा हेङगर सहित २०० वटा स्टलहरु रहने र सबै वुक भैसकेको छन् । एक्स्पोमा नेपालका घरेलु, साना, मझौला तथा ठुला उद्योगहरुका साथै भारत, बंगलादेश, पाकिस्तानका उत्पादित वस्तुहरु रहने संयोजक सारडाले बताए।
एक्स्पो सञ्चालनका लागि दुई करोड ५० लाख खर्च हुने संघका अध्यक्ष राठीले जानकारी दिए।संघले यसअघि विस २०५३, २०५७, २०६२, २०७०, २०७५, २०७८ र २०७९ मा ब्यापार मेला आयोजना गरेको थियो ।
