पूर्वाञ्चल खबर
आज आयोजित गाउँसभामा अध्यक्ष माझीले पासै नभएको विधेयकहरु पास भइसकेको र नीति तथा कार्यक्रम कार्यपालिकाबाट पास नगरी गाउँसभामा पेश गरेको भन्दै वडा नम्बर १, ५ र ७ का वडाध्यक्षहरुले प्रश्न गरेका थिए । तर पालिका अध्यक्ष माझीले भने गाउँसभाको अनुशासन उल्लंघन गरेको आरोप लगाउँदै वडा नम्बर ५ र ७ का वडाध्यक्षहरुलाई सभाबाट निकाल्न पहिल्यै बोलाइएका प्रहरीलाई आग्रह गरे । त्यसको विरोधमा वडाध्यक्षहरु उत्रिएपछि उनले कारवाहीको डण्डा चलाएका थिए ।
गाउँसभामा आफ्नो गैरकानुनी कदमको विरोध भएपछि माझी आफैं सभा हलको ढोकामा पुगेर गाउँसभाका सदस्यहरु माथि औंला ठड्याउँदै अमर्यादित रुपमा प्रस्तुत भएको बताईएको छ । माझी गाउँसभाका सदस्यहरुको प्रश्नको जवाफ दिनुको साटो गाउँसभाको बैठक नै स्थगित गर्दै बाहिरिने क्रममा तीन जना वडाध्यक्षमाथि कारवाही गरेको घोषणा गरेपछि विवाद चर्किएको थियो । आफूसँग विवाद गरेको र अनुशासन उल्लंघन गरेको आरोपमा वडाध्यक्षहरुलाई निस्कासित गरिएको छ ।
निस्कासित हुनेमा गाउँपालिकाको प्रवक्ता समेत रहेका वडा नम्बर ७ का अध्यक्ष विरेन्द्र चौधरी र ५ नम्बरका अध्यक्ष भेषनारायण चौधरी छन् । उनीहरु दुवै एमालेबाट निर्वाचित हुन् । अध्यक्षलाई प्रश्न गरेकै कारण आफूहरुलाई यस्तो कारबाहीको घोषणा भएको भन्दै दुवै वडाध्यक्षले यसको कानुनी उपचार खोज्ने बताएका छन् ।
