पूर्वाञ्चल खबर
कक्षा ११ विज्ञान संकायका लागि कलेजले लिएको प्रवेश परीक्षामा देखिएको विद्यार्थीको यो उत्साहजनक उपस्थितिले गुणस्तरीय शिक्षाप्रतिको भरोसा र कलेजको साखलाई पुनः पुष्टि गरेको छ ।
कलेजले यस वर्षका लागि निर्धारण गरेको ८ सय सिटका लागि क्षमताभन्दा झण्डै तीन गुणा बढी विद्यार्थी प्रतिस्पर्धामा उत्रिएका छन् । कलेजका निर्देशक भूपेन्द्र दाहालका अनुसार प्रवेश परीक्षामा कोशी प्रदेशका १४ वटै जिल्लाका साथै मधेश प्रदेशबाट समेत ठूलो संख्यामा विद्यार्थीहरू सहभागी हुन आएका थिए । “सीमित कोटा भए पनि विद्यार्थीको चाहना र आकर्षण लोभलाग्दो देखियो,” निर्देशक दाहालले भने, “यो भीड केवल विद्यार्थीको संख्या मात्र होइन, कलेजले विगतमा प्रदर्शन गरेको उत्कृष्ट नतिजाप्रतिको विश्वास पनि हो ।”
शिक्षादीप कलेज विज्ञान संकायको अध्यापन र नतिजामा प्रदेशकै ‘मोडल’ कलेजका रूपमा स्थापित छ । यहाँ अध्ययन गरेका विद्यार्थीहरूले हरेक वर्ष चिकित्सा मेडिकल र इन्जिनियरिङतर्फका प्रवेश परीक्षामा मुलुकभरमै उत्कृष्ट नतिजा निकाल्दै पूर्ण छात्रवृत्तिमा नाम निकाल्न सफल भइरहेका छन् । यही ऐतिहासिक सफलता र कलेजको कडा अनुशासन नै विद्यार्थी आकर्षणको मुख्य कडी बनेको छ ।
निर्देशक दाहालले थपे, “हामी केवल कक्षाकोठाको पठनपाठनमा मात्र सीमित छैनौँ, विद्यार्थीलाई भविष्यको डाक्टर वा इन्जिनियर बनाउन आवश्यक पर्ने जग नै यहाँ निर्माण गर्छौं । कलेजको भौतिक पूर्वाधार र दक्ष प्राध्यापकहरूको मेहनतले नै शिक्षादीपलाई यो उचाइमा पुर्याएको हो ।”
विद्यार्थीको बढ्दो चापलाई ध्यानमा राख्दै कलेजले अत्याधुनिक प्रयोगशाला, प्रविधिमैत्री कक्षाकोठा र शैक्षिक वातावरणमा विशेष लगानी गरेको जनाएको छ । आज सम्पन्न प्रवेश परीक्षाको नतिजा योग्यताक्रमका आधारमा छिट्टै प्रकाशन गरी भर्ना प्रक्रिया अगाडि बढाइने कलेज प्रशासनले जानकारी दिएको छ ।
