ग्रेडेट स्कुलको कविता प्रतियोगितामा प्रशान्त प्रथम

६० औं राष्ट्रिय बालदिवसका अवसरमा आयोजित कार्यक्रममा दुई दर्जनभन्दा बढी प्रतिस्पर्धीलाई पछि पार्दै प्रशान्त प्रथम भएका हुन् । कवि एवं पत्रकार मीनकुमार नवोदित निर्णायक रहेको प्रतियोगितामा कक्षा १० का अमिस गिरी द्वितीय, कक्षा ८ की तृष्णा मैनाली तृतीय हुँदा कक्षा ८ कै प्रश्रय विष्ट र कक्षा ९ की सरस्वती हेम्रनले सान्त्वना पुरस्कार प्राप्त गरेका छन् ।

विजयी विद्यार्थीहरुलाई कार्यक्रमका प्रमुख अतिथिसमेत रहेका नवोदित, विद्यालयका सिनियर शिक्षक विपीन यादव र अतिरिक्त क्रियाकलाप संयोजक प्रभात बरालले पुरस्कार प्रमाणपत्र प्रदान गरेका थिए ।

कार्यक्रममा नवोदितले विद्यार्थीले पठनपाठनसँगै अतिरिक्त क्रियाकलापमा पनि ध्यान दिनुपर्नेमा जोड दिए । उनले अहिले सैद्धान्तिक र व्यवहारिक शिक्षा जरुरी रहेको औंल्याए । साहित्य सिर्जना गर्ने व्यक्तिले अरुका लेख र रचना पनि पढ्नु आवश्यक रहेको बताए ।

विद्यार्थीभित्र लुकेर रहेको प्रतिभा प्रस्फुटन गराउने उद्देश्यले कविता प्रतियोगिता आयोजना गरेको विद्यालयका प्रिन्सिपल प्रेमलालसिंह सुवालले जानकारी दिए । विद्यालयले पठनपाठनसँगै कविता, वक्तृत्वकला, वादविवाद, हाजिरीजवाफ, खेलकुदलगायतका विभिन्न प्रतियोगिता आयोजना गर्दै आएको उनले बताए । अध्ययनसँगै अतिरिक्त क्रियाकलापमा पनि विद्यार्थीलाई अब्बल बनाउने उद्देश्यले विभिन्न प्रतियोगिता गर्ने गरेको सुवालले उल्लेख गरे ।