पूर्वाञ्चल खबर
आज साढे १२ बजे बस्ने बैठकमा प्रमुख प्रतिपक्षी दल नेकपा एमाले बैठकमा उपस्थित नभएपछि बैठक स्थगित भएको हो ।
मुख्यमन्त्री राजेन्द्र राईले आज विश्वासको मतसम्बन्धी प्रस्ताव पेश गर्ने तयारी गरेका थिए । बैठक स्थगित भएपछि मुख्यमन्त्री राईले आज विश्वासको मतसम्बन्धी प्रस्ताव पेश गर्नै पाएनन् ।
सभामुख प्रदीपकुमार भण्डारीले एमाले उपस्थित नभएकाले बैठक भोलि बिहान साढे ११ बजे बस्ने जानकारी सदनमा गराउँदै स्थगित गरेका थिए ।
संसद नियमावलीमा कोही पनि प्रतिपक्षी दलका सांसद संसदमा उपस्थित नभए बैठक चल्न नसक्ने उल्लेख छ । सोही अनुसार बैठक स्थगित भएको सभामुखको भनाइ छ ।
एमालेले भने आजको प्रदेश १ को बैठक स्थगित गर्न माग गरेको थियो । अधिवेशनका लागि जिल्ला गएका प्रदेशसभा सदस्यहरू आइनपुगेको भन्दै एमालेले बैठक स्थगित गर्न माग गरेको हो ।
एमालेका प्रदेश १ का प्रमुख सचेतक बुद्धिराज राजभण्डारीले बन्दका कारण जिल्ला गएका प्रदेश सभा सदस्य आइनपुगेकाले आजको बैठक स्थगित गर्न माग राख्दै संसद् सचिवालयमा पत्र दिएका थिए ।
