गुद्रीका व्यापारी अर्को बजार निर्माणमा, करोडौं लगानी गरेर निर्माण गरेको एकीकृत फलफुल तथा थोक तरकारी बजार अलपत्र

खबर पूर्वाञ्चल, १४ फाल्गुन २०७६, बुधबार ०८:३२

विराटनगर / मोरङ्गको कटहरी गाउँपालिका १ मा सरकारले १६ करोड ७६ लाख रुपैयाँ लगानी गरेर निर्माण गरेको एकीकृत फलफुल तथा थोक तरकारी बजार अलपत्र बनेको समाचार आजको हाम्रोमत दैनिकमा राकेश कर्णले लेखेका छन् ।

२०७५ चैत्र ३ गते नै प्रधानमन्त्री केपी शर्मा ओलीले उद्घाटन गरी प्रदेश १ सरकारलाई हस्तान्तरण गरेको तरकारी बजार सञ्चालनमा आउन सकेको छैन ।

विश्व बैंकको आर्थिक सहयोगमा निर्माण गरिएको तरकारी बजार उद्घाटन भएको एक वर्ष पुग्नलाग्दासमेत सञ्चालनमा आउन नसकेको हो । महानगरपालिकाको बिचमा रहेको अव्यवस्थित गुद्रीबजार स्थानन्तरण गर्नेगरी निर्माण भएको तरकारी बजारमा गुद्रीका व्यापारी जान नचाहेपछि विराटनगर–११ बसपार्क पश्चिम आँप बगैचाको छेउको ३ बिगाहा जमिनमा गुद्रीबजार सार्ने तयारी भएको छ । तर, त्यसमा महानगरको सहमति भने छैन ।

गुद्री बजार व्यावस्थापन समितिले सो स्थानमा फलफुल तथा तरकारी बजारका लागि भौतिक संरचना निर्माणको कार्य गरिरहेको छ । पशुपति भगतलगायतको समूहले नागेश कोईरालाको जग्गा ठेक्कामा लिएर तरकारी बजार सञ्चालन गर्न संरचना निर्माण थालेको हो । महानगरपालिकाको ईजाजतबिना तरकारी बजारको लागि संरचना निर्माण भएको ईन्जिनियर अर्जुन थापाले बताए ।

महानगरपालिकाले विराटनगरको ई–प्लटमा अवस्थित रहेको गुद्री बजार खाली गरेर त्यहाँ व्यवस्थित कम्प्लेक्स बनाउने योजना बनाएको छ । तर, कटहरी १ मा करोडौंको लगानीमा निर्माण भएको तरकारी बजार व्यवस्थापनको भने टुंगो लागेको छ ।

प्रदेश १ को भूमि व्यवस्था, कृषि तथा सहकारी मन्त्रालयलाई बजार सञ्चालनको जिम्मा छ । मन्त्रालयले कटहरी फलफूल तथा तरकारी थोक बजार विकास समिति बनाएर काम गरिरहेको जनाएको छ । बजार सञ्चालनका लागि प्रदेश १ कृषि निर्देशनालयका प्रमुखको संयोजनमा समिति बनेको छ ।

समितिका कार्यकारी निर्देशक पशुपति पोखरेलले महानगरको गुद्रिका व्यापारी स्टल लिन नआउँदा काम आगाडि बढ्न नसकेको बताए ।

दुई पटक सूचना आह्वान गर्दा पनि गुद्रीका कोही पनि व्यापारिले बुकिङ नगरेकोले बजार सञ्चालनमा आउन नसकेको हो । गुद्रीका व्यापारी नआए अन्यलाई खुल्ला गरेर अगाडि बढ्ने पोखरेलले बताए । महानगरपालिकाले चासो नदिएका कारण बजार सञ्चालनमा अन्योल भएको उनको भनाइ छ ।

गुद्री बजारलाई स्थानान्तरण गर्ने उद्देश्यसहित त्यहाँका व्यापारस्लाई स्टलमा ७५ देखि ८० प्रतिसतसम्म छुटमा स्टल खरिद गर्ने सूचना निकालिएको थियो ।

गुद्रीका व्यापारी जान अटेरी गरेका कारण प्रदेश सरकारलाई अरु व्यवसायीलाई कटहरीको बजारमा राख्नसक्ने राय लेखेर पठाउने महानगरपालिकाका प्रमुख प्रशासकीय अधिकृत एकदेव अधिकारीले बताए ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

NBC

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५