CLASSICTECH NET

मोरङ व्यापार संघको निर्वाचन, अध्यक्षमा सारडा भन्दा राउत बलियो

खबर पूर्वाञ्चल, २३ बैशाख २०७४, शनिबार २०:५०
विराटनगर, २३ बैशाख / मोरङ व्यापार संघको ३१ औ कार्य समितिकालागि निर्वाचन नै हुने भएको छ । विभिन्न स्वार्थका कारण दुई समूहमा विभाजित व्यवसायीहरुबीच नयाँ नेतृत्वकालागि निर्वाचन हुने पक्का भएको हो ।
सर्वसम्मत नेतृत्वकालागि पूर्व अध्यक्षहरुले निरन्तर गरेको पहल असफल भएपछि आइतवार नयाँ नेतृत्वकालागि निर्वाचन हुने पक्का भएको हो । शुक्रबार उम्मेदवारी फिर्ता लिने अन्तिम समयसम्म पनि समझदारी नभएपछि निर्वाचन हुने पक्का भएको हो । आइतबार प्रोक्सी मतदाताबाट निर्वाचन हुने निर्वाचन समितिले जनाएको छ ।
मोरङ व्यापार संघका पूर्वअध्यक्ष, वर्तमान अध्यक्ष र केही पदाधिकारीहरुसहितको विभिन्न छलफल तथा अनौपचारिक छलफलमा राजेन्द्र राउतलाई अध्यक्ष र प्रकाश मुन्दडालाई वरिष्ठ उपाध्यक्ष बनाउने पुरानो सहमति तोडिएपछि चुनावी माहोल तातेको हो ।
अहिलेका अध्यक्ष पवनकुमार सारडाले सहमतिका लागि पर्याप्त पहल नगरी आफू नै अध्यक्ष हुने तयारी गर्दै मनोनयन दर्ता गरेपछि सहमतिको सबै ढोका बन्द भएको बताइएको छ । भद्र सहमतिलाई बेवास्ता गरेर सहमतिको प्रयासलाई पाखा लगाएको वरिष्ठ उपाध्यक्ष राजेन्द्र राउतको भनाइ छ । अहिले पनि आफू सहमतिको प्रयासमा रहेको उनको भनाइ छ ।
अन्ततः राउत समूह र मुन्दडा समूहमा विभाजित मोरङ व्यापार संघमा सारडा मुन्दडाको सहमतिमा अध्यक्ष बन्ने तयारीमा लागेका छन् । सारडाले अनुभवी र युवा पुस्तालाई साथमा लिएर आफू चुनावी मैदानमा उत्रिएको बताए । यता, महासचिव प्रकाश मुन्दडाले भने चुनाव लोकतान्त्रिक पद्धति भएकाले यसबाट आएको परिणामले व्यापारीहरुको हकहित हुने बताए ।
संघमा वाणिज्य क्षेत्रबाट ८ जना र उद्योग क्षेत्रबाट ८ जना सदस्य निर्वाचित हुन्छन् । त्यस्तै वस्तुगत क्षेत्रबाट दुईजना र शाखाहरुबाट एक जना निर्वाचित हुन्छन् । यी सदस्यहरुबाट अध्यक्ष र पदाधिकारी बन्ने प्रावधान रहेको छ ।
उद्योग क्षेत्रमा राउत समूह बलियो छ भने वाणिज्य क्षेत्रमा सारडा समूह बलियो छ । उद्योगबाट उम्मेदवारी दिएका देवकीनन्दन अग्रवाल, विजेन्द्र परासर, रविनकुमार दाहाल, रमेशकुमार राठी, सुवास आचार्य र श्रवणकुमार अग्रवाल खुलेर राउतको पक्षमा लागेका छन् ।
त्यस्तै अनिल सारडा, अनुपम राठी, देवाशिष गोल्छा, पवनकुमार सारडा, पवन राठी, ललित बोहरा, सारडा समूहमा छन् ।
अहिलेको कार्यसमितिमा रहेका सुनिल टिवडेवाल केही समयअघि राउत समूहमा भएपनि अहिले खेमा परिवर्तन गरेर सारडाको नजिक पुगेको बताइएको छ । त्यस्तै वाणिज्य क्षेत्रमा दशजना उम्मेदवार छन् । त्यसमा सारडा समूहका प्रकाश मुन्दडासहित अनिलकुमार साह, नविन रिजाल, पियुष तोदी, विकासकुमार बेगवानी, मनिष मारु, मुकेशकुमार राठी र सुशीलकुमार जोशी छन् । सन्तोष चौधरी र कृष्णकुमार लोहिया कसैको पक्षमा खुलेका छैनन् ।
बर्तमान सचिव रहेका अनिलकुमार साह केही अघिसम्म राउतकै पक्षमा देखिन्थे । अहिले उनी कित्ता परिवर्तन गरी अर्को समूहमा गएका छन । दुबै पक्षको दाबी अनुसार उद्योग क्षेत्रमा राउत समूह र वाणिज्य क्षेत्रमा सारडा समूहका प्रतिनिधिहरु विजयी हुनेछन् । तर, दुवै समूह दुवैतिर खेलेर आफ्ना पल्ला भारी बनाउने कसरतमा लागेका छन् ।

तपाईको प्रतिक्रिया

*

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५