पूर्वाञ्चल खबर
एमाले कोशी प्रदेशका इन्चार्जसमेत रहेका केन्द्रीय सचिव शेरधन राईले शनिबार कार्कीसँग भेट गरेर राजीनामा दिन आग्रह गरेका हुन् ।
यसअघि उपाध्यक्ष विष्णुप्रसाद पौडेल र महासचिव शंकर पोखरेलसँगको छलफलमा अध्यक्ष केपी शर्मा ओली मुख्यमन्त्री कार्कीलाई नै निरन्तरता दिन सहमत भएको बताइए पनि पछिल्लो समय पार्टी नेतृत्व मुख्यमन्त्री फेर्ने पक्षमा उभिएको स्रोतको दाबी छ ।
स्रोतका अनुसार अध्यक्ष ओलीले कोशी प्रदेश इन्चार्ज एवं पार्टी सचिव राईलाई यस विषयमा समन्वय गर्ने जिम्मेवारी दिएका छन् । सोही क्रममा दुई दिनदेखि विराटनगरमा रहेका राईले मुख्यमन्त्री कार्कीसँग भेट गरी पार्टी नेतृत्वको चाहनाबारे जानकारी गराएका थिए । छलफलका क्रममा राईले पदबाट मार्गप्रशस्त गर्न आग्रह गरे पनि मुख्यमन्त्री कार्कीले भने तत्काल राजीनामा नदिने अडान राखेका छन् ।
नेपालको संविधानको धारा १६८ (५) बमोजिम मुख्यमन्त्री बनेका कार्कीले यो उपधारा सरकार गठनको अन्तिम संवैधानिक विकल्प भएकाले राजीनामा दिँदा प्रदेशमा संवैधानिक संकट आउन सक्ने तर्क गर्दै आएका छन् । साथै यस्ता विषयमा पार्टीको सचिवालय बैठकबाटै औपचारिक निर्णय हुनुपर्ने उनको भनाइ छ ।
पार्टीभित्रको आन्तरिक समीकरण र शक्ति सन्तुलनका कारण सिर्जित यो परिस्थितिमा राजनीतिक स्थायित्व र संवैधानिक जटिलतालाई ध्यानमा राखेर हालका मुख्यमन्त्रीहरूलाई नचलाउने पक्षमा केही शीर्ष नेताहरू उभिएका थिए । तर, पछिल्ला घटनाक्रमले कोशी प्रदेशको सत्ता समीकरण र एमालेको आन्तरिक राजनीतिलाई थप पेचिलो बनाएको छ ।
मुख्यमन्त्री कार्कीले राजीनामा नदिएमा अगाडि बढ्ने विकल्प र संसदीय दलभित्रको अंकगणितबारे समेत शीर्ष तहमा छलफल भइरहेको बुझिएको छ ।
