खबर पूर्वाञ्चल
भोलि नेपाल साथै नेपाली बसोबास गर्ने विभिन्न देशमा विशेष हर्षोल्लासका साथ विजयादशमी मनाइँदैछ । आफ्ना अभिभावक तथा मान्यजनबाट टीका र जमरा लगाएर आशीर्वाद लिई दसैं मनाउने परम्परा छ ।
दशैंको टीकाको दिन बिहान ८ बजेर १ मिनेटमा देवी विसर्जन गर्ने शुभ साइत रहेको छ । देवी विसर्जन गरिसकेपछि बिहान ११ बजेर ५५ मिनेटको साइतमा टीका लगाउन उत्तम साइत भए पनि भोलि बिहानैबाट टीका लगाउन सकिने नेपाल पञ्चाङ्ग निर्णायक समितिका अध्यक्ष प्रा.डा. रामचन्द्र गौतमले जानकारी दिए । उत्तम साइत पर्खेर टीका लगाउनेका लागि ११ बजेर ५५ मिनेटको समय रहेको उनले जनाए ।
टीका र जमरालाई दूर्गादेवीको प्रसादको रुपमा लगाउने प्रचलन रहेको छ । कसै कसैले टीकाको दिनदेखि कोजाग्रत पूर्णिमासम्म र कसैले विजया दशमीको दिन एक दिनमात्र टीका लगाउने गर्दछन् ।
असोज १९ गते बिहीबार कोजाग्रत पूर्णिमाका दिन महालक्ष्मीको व्रत बसी पूजा गरेपछि दशैं औपचारिक रुपमा सम्पन्न हुन्छ ।
तपाईको प्रतिक्रिया