पूर्व जनमुक्ति सेना भगत जेल पठाइए

खबर पुर्वान्चल, २७ पुष २०७४, बिहीबार

विराटनगर,२७ पुस /विस्तृत शान्ति सम्झौता भई दश वर्षसम्म चलेको शसस्त्र युद्ध अन्तिम निष्कर्षमा पुग्नै लागेको बेला नेपाली सेनाले पूर्व जनमुक्ति सेनाका एक जवानलाई पक्राउ गरि कारवाही गरेको छ ।

सशस्त्र युद्धको बेला नेपाली सेनाबाट विद्रोह गरेर हतियारसहित जनमुक्ति सेनामा प्रवेश गरेका मोरङ ग्रामथान गाउँ पालिकाका सुनिककुमार भगतलाई नेपाली सेनाले सैनिक ऐन अन्तरगत पक्राउ गरी केही दिन अघि कारागार चलान गरेको हो ।

भर्खरै सम्पन्न प्रदेश तथा प्रतिनिधिसभा निर्वाचनको पूर्व सन्ध्यामा मोरङ प्रहरीले घरबाटै गिरफ्तार गरेर सार्वजनिक अपराधको मुद्दामा कारवाही गरिसकेपछि प्रहरीले भगतलाई नेपाली सेनाको जिम्मा लगाएको थियो ।

मोरङका प्रहरी उपरीक्षक अरुणकुमार बि सीले विप्लव समर्थित कार्यकर्ताहरुबाट चुनाव विथोल्ने कार्य भइरहेको बेला पक्राउ गरेको र पछि नेपाली सेनाले थाहा पाएर पत्र पठाएपछि आफुले बुझाएको बताए । उनले भने, ‘प्रहरीले पक्राउ गरेर सेनालाई जिम्मा लगाएको भन्ने कुरा सत्य होइन, नेपाली सेनाले आफ्नो भगौडा पक्राउ परेको जानकारीमा आएकोले कारवाहीकालागि बुझाउन भनेपछि सार्वजनिक अपराधमा कारवाही टुंगिएपछि सेनालाई बुझाएका हौं, द्वन्दकालिन मुद्दामा कारवाही गर्न भनेर पठाएको होइन ।’

तात्ककालिन बिद्रोही शक्ति नेकपा माओवादीले नेपाली सेना तथा प्रहरी सेवामा कार्यरतहरुलाई विद्रोहकालागि अव्हान गरेको बखत भगत जनमुक्ति सेनामा हतियार सहित समाहित भएका थिए । भोजपुरको बिष्णुदल गणमा सैनिक जवान पदमा कार्यरत रहेको बेला दुई थान राइफल, त्यसमा लाग्ने पाँच थान म्यागजीन र ९ सय थान गोलीसहित २०६२ साल साउन ८ गते तात्कालिन जनमुक्ति सेनामा प्रवेश गरेको घटनालाई लिएर नेपाली सेनाले कारवाही गरेको हो ।

नेपाली सेनाका प्रवक्ता गोकुल भण्डारीले नेपाली सेनाको भगौडा सिपाहीको रुपमा भगतलाई कारवाही गरेको प्रतिक्रिया दिए । ‘भगत हाम्रो सदस्य हो अर्थात् नेपाली सेनाको सदस्य भएकोले हतियारसहित भागेकोले कोट मार्सल गरेर कारवाही गरेका हौं,’ उनले भने, ‘त्यसलाई शान्ति सम्झौतासँग जोड्नु हुँदैन ।’ सेनाबाट हतियार लिएर भागेको जो कोहीलाई पनि सैनिक ऐन अनुसार कारवाही हुन्छ र त्यस्ता अरु कोही भए पनि ऐन अनुसार कारवाही अघि बढ्ने उनले बताए ।

भगत पक्राउको विषयमा नेकपा माओवादी केन्द्रका प्रवक्ता पम्फा भूसालले भने शान्ति सम्झौता विपरितको कार्य भएको प्रक्रिया दिइन् । ‘द्वन्द्वकालिन हरेक प्रकारका मुद्दा हेर्ने निकाय भनेको सत्य निरुपण तथा मेलमिलाप आयोग मार्फत हो, अहिले शान्ति प्रकृयालाई प्रभावित गर्ने गरी कसैले पनि गतिविधि गर्नु उचित हुँदैन,’ उनले भनिन् । भगतमाथि भएको कारवाहीको विषयमा पार्टीमा छलफल गरी धारणा सार्वजनिक गर्ने उनले बताइन् ।

पक्राउ पछि भगतलाई कोर्ट अफ इन्क्वाइरी गरी कारागार
व्यवस्थापन विभाग जगन्नाथ देवलमा राखिएको छ । दुई साना छोराछोरीसहित घरमै बसिरहेको अवस्थामा प्रहरीले पक्राउ गरेपछि दुई वालवालिकाको बिचल्ली भएको छ । श्रीमती वैदेशिक रोजगारीमा रहेकी छिन् ।

तपाईको प्रतिक्रिया

खबर पुर्वान्चल

बिराटनगर, नेपाल

सम्पर्क: ०२१-५२४५८४

इमेल: mail@khabarpurwanchal.com

Khabarpurwanchal is Leading News Company In Eastern Development Region Of Nepal, Providing Up to date Local as well as country crunch News.